Жакында эле Тынчтык инновациялары боюнча Булан институту "Мектептин бюджеттен жана бюджеттен сырткары каржыланышы: Ата-энелерден акча чогултуу муктаждыкпы же коррупциябы?" деп аталган баяндама-иликтөөнү жарыя кылды. Борбор Азия программасынын жетекчиси, конфликтолог жана журналист Чолпон Орозобекова Sputnik Кыргызстан агенттигине баяндама туурасында айтып берди.
"Бул сапар мектептердеги ата-энелерден акча чогултуу көйгөйүн алдык. Себеби, айрыкча Бишкек шаарында ата-энелер арасында нааразылык абдан чоң, жылдан жылга күчөп бара жатат. Ар кандай формада акча чогултуулардын түрлөрү бар. Мектептерге республикалык бюджеттен, жергиликтүү бюджеттен нормативдик финансылоо деп коет, окуучунун башына карап каражат саналат. Максатыбыз — ошол формула менен берилип жаткан акча мектептин кайсы муктаждыктарын жабат, кайсынысына акча калбай калып жатат, акча чогултууга зарылдык барбы деген суроого жооп издедик", — деди Орозобекова.
Бишкектеги мектептердин жалпы долбоордук сыйымдуулугу — 75975 болсо, бүгүнкү күндө билим алып жаткандардын саны – 147660 окуучу. Бул эки эсе көп. Иликтөөдө Бишкек шаардык бийлиги тез арада жаңы мектептерди куруп, баш калаа мектептердеги орун тартыштыкты жойбосо, мектептердин финансылык муктаждыктары өсө берери айтылган.
