Төкмө ал тургай хадисте да кербендин жолу тосулбайт деп айтыларын эске салды. Ал кайрылуусун социалдык тармактагы баракчасына жарыялады.
Амандык тилеп баштайын,
Амансызбы Нур агам.
Мен кадимки кыргыз жигити,
Кайрылып сизди сураган…
… Сиз казаксыз мен кыргыз,
Таттуусун көрүп турмуштун,
Ачуусуна чыдаган, — деген саптар менен баштаган.
Жеңишбек акын Назарбаевге "Эл басы", "Нур агам", "султан" деп кайрылып, аны даражасын санап келип, кыргыз-казактын окшош, бир тууган экендигин айтып, чек ара маселесин жөнгө салууну сураган. Эки элдин тарыхындагы бир туугандан артык болгон Мухтар Шаханов менен Чыңгыз Айтматовдун достугун эске салып, окшош таланттар Токтогул менен Жамбылды кошуп ырдаган.
Кыргыздар күйсө, күйөсүз.
Кыргыздарды сүйөсүз,
Кыргыздар күлсө күлөсүз.
Биздин президент кичине "таттуураак" сүйлөп коюптур,
таарынгансып жүрөсүз.
Бирок Казакстандын жеринде
Ырыскы тапкан кыргыздын, эч бирөөсү күнөөсүз.
Хадистерде айтылат,
Кербендин жолу тосулбайт,
Муну менден да жакшы билесиз… — деген акын.
Жеңишбек Жумакадыр казак президентине катуу кетпеңиз деген таризде кайрылып, ачка калса, асырап алган тарыхты эске салып коюну эп көргөн.
Калың эл турат, кыйналып,
Айкөлдүк кылып Нур ага,
чек араңызды ачыңыз.
… Өзөндө суубуз бир эле,
Өзгөчө катуу кетпеңиз,
Өзөккө ууну сеппеңиз,
Ач калса багып алышкан,
Айрыкча, кыргыз даанышман,
Ошол тарыхты эстеңиз, — деп ырдаган.
Назарбаевди кеменгер деп атап, ага мындай иш кылуу жарашпастыгын айтып келип, тиреше берсек, айтыла турган нерсе көптүгүн эскерткен.
… Жумурткадан кыр издеп,
алыстай берсек акырын
Анда айтыла турган нерсе көп…
Чек араны буюрса,
тез арада Нур ага,
Чечесиз го деп ишенем, — деп аяктаган кайрылуусун.
