Өзгөчө кырдаалдар министрлиги тарабынан кыргыз-казак чек арасында кармалып турган айдоочуларга акысыз тамак-аш таратылды. Бул туурасында аталган ведомствонун маалымат кызматы кабарлады.
Билдирүүгө караганда бүгүн, 28-октябрда, Чүйдөгү "Ак-Тилек" жана Таластагы "Чоң-Капка" көзөмөл өткөрүү жайында кезек күткөн айдоочуларга ысык тамак берилген.
Эскерте кетсек, мындан эки күн мурун президент Алмазбек Атамбаев кыргыз-казак чек арасында кезек күтүп турган айдоочуларга тамак уюштуруу үчүн бир миллион сом бөлгөн. Ошондой эле ал каражаттын эсебинен дары-дармектерди алуу да пландалган.
ӨКМдин 28-октябрга карата берген маалыматы боюнча "Ак-Тилекте" 428, "Чалдыбарда" 17, "Ак-Жолдо" 13 жүк ташуучу жана 19 жеңил машина "Чоң-Капкада" 120 оор жүк ташуучу жана 30 жеңил унаа кезекте турат.
Чек ара бекеттеринде 17 чатыр тигилип, ӨКМ кызматкерлери, Тез жардам кызматы, ИИМ кызматкерлери нөөмөттө турууда. Ошондой эле жергиликтүү бийлик органдары ысык-тамак аш менен камсыздап жатышат.
