БИШКЕК, 22-окт. — Sputnik. Ысык-Көлдүн Бостери айылында көчмөндөрдүн стилинде курулган "Nomad" аталышындагы амфитеатр ачылды.
Иш-чарага маданият, маалымат жана туризм министри Түгөлбай Казаков, Кыргызстандагы элчилер жана жергиликтүү тургундар катышты.
Амфитеардын негиздөөчүсү Аскар Салымбековдун айтымында, маданий жайды куруу демилгеси Көчмөндөр оюндарынын кийин пайда болгон.
Ошондой эле ал мындан кийин залкар жазуучу Чыңгыз Айтматов пландап кеткен объектини курууга белсенип жатканын кошумчалады.
"Чыңгыз Айтматов тирүү кезинде Ысык-Көл жээгинде дүйнөлүк кинофестивалды өткөрүүгө боло турган жай куруу идеясын айткан экен. Өзү башында туруп архитекторлор менен биргеликте долбоорун дагы түзгөн. Кийин кайтыш болуп, баштаган иши токтоп калган. Муну өкмөт, ишкерлер колдоп берсе аны ишке ашыруу ниетибиз бар", — деди ал.
Көчмөндөрдүн амфитеатры көл жээгинде жайгашып, ичине 1000ге чукул адам батыра алат. Сахнанын артында көл көрүнүп тургандыктан артисттер суунун үстүндө жүргөндөй образ жаратат. Курулуш үч айга созулуп, амфитеатрдын астына конок күтүүчү боз үйлөр дагы салынган.
