БИШКЕК, 20-окт. — Sputnik. Өлкөнүн бизнес ассоциациялары жүк ташуучулардан чек ара толук ачылганга чейин күтүп турууну өтүндү. Себеби, ал жакта кезек күткөн унаалардын саны кескин өсүп кеткен.
Кыргыз-казак чек арасындагы абал 10-октябрдан тарта оорлой баштаган. Расмий Астана мындай кырдаал чек арадагы аткезчилик менен күрөшүү аракетинен улам болуп жатканын билдирген. 18-октябрда Кыргызстандын премьер-министри Сапар Исаков Казакстанга иш сапары менен барып, чек арадан жарандардын, жеңил автоунаалардын жана жүргүнчү ташыган транспорттордун тоскоолдуксуз өтүүсү боюнча сүйлөшүүгө жетишкен.
"Учурда эки мамлекеттин жумушчу топтору аталган маселе боюнча иштеп жатат. Беш күндүн ичинде кандай чаралар көрүлүшү керектигин аныкташат. Анын ичинде чек арада турган жүк ташуучу автоунааларды өткөрүүнүн жол-жобосу каралат. Тактап айтканда, беш күн ичинде жумушчу топтордун биргелешкен ишинин жыйынтыгында көйгөйлүү маселелер чечилет", — деп айтылат билдирүүдө.
Бул кайрылууга Американын Кыргызстандагы соода палатасы, КРдин Соода-өнөр жай палатасы, ЖИА бизнес ассоциациясы, Атамекендик өндүрүшчүлөр ассоциациясы, Программалык камсыздоону иштеп чыгуучулар жана кызмат ассоциациясы, чет элдик инвесторлор ассоциациясы, Чакан ГЭС ассоциациясы, Бишкек ишкер клубу, Кыргызстандын ишкерлер биримдиги, Жеңил өнөр жай ишканаларынын "Легпром" ассоциациясы жана Жеткирүүчүлөр ассоциациясынын өкүлдөрү кол койгон.
