БИШКЕК, 14-окт. — Sputnik. Бүгүн өлкө аймагында шайлоонун алдындагы "жымжырттык күнү". Добуш берүүнүн алдындагы 24 сааттын ичинде талапкерлердин милдеттери тууралуу Sputnik Кыргызстан агенттигине Борбордук шайлоо комиссиясынын мүчөсү Кайрат Осмоналиев түшүндүрүп берди.
"Мыйзамга ылайык, бүгүн бардык үгүт иштери токтотулат. Бир дагы талапкер же анын расмий өкүлдөрү ал тууралуу мактоо-жактоо сөздөрүн ЖМКлар аркылуу дагы, эл чогулган жерде дагы айта албайт. Шартты бузган талапкер же анын өкүлү КРдин Административдик жоопкерчилик боюнча кодексинин 52 жана 54-беренелеринде жазылгандай 1000-2000 сом айып төлөйт", — деди Осмоналиев.
Деген менен соцтармактардын "оозун" жабуу мүмкүн эмес. Анткени Кыргызстандын аймагында каттоодон өтпөгөндөн кийин алардын кайсы бир ишин жоопко тартууга мыйзамдын күчү жетпейт.
Көчөлөрдө жана коомдук жайларда мурда илинип калган көрнөк-жарнактар өз ордунда кала берет.
"Жымжырттык күнүнүн" шарттарын Sputnik Кыргызстандын материалынан окуй аласыз>>
