ОШ, 5-окт. — Sputnik. Ош шаарынын күнүнө карата Манас Ата аймактык кеңешинде Исхак Раззаков атындагы эс алуу багы ачылып, пайдаланууга берилди. Бул тууралуу мэриянын көрктөндүрүү жана жашылдандыруу комбинатынын башчысы Айгүл Наватова Sputnik Кыргызстан агенттигине билдирди.
Анын айтымында, аталган эс алуу багы буга чейин жеке ишкерге убактылуу берилгендиктен каралбай, эс алуу үчүн шарттар түзүлгөн эмес.
"Эс алуу багын оңдоп-түзөөнүн жалпы сметалык баасы 14 миллион сомду түзгөн. Бирок беш миллион сом гана керектелди. Анын бир миллиону жарыктандырууга, ал эми төрт миллиону отургучтарды орнотууга, брусчатка төшөөгө, таштанды үчүн орнотулган урналарга жумшалды", — деди Наватова.
Калаа тургундары эс алуу багын көрктөндүрүп, жашылдандырууга дем алыш күндөрү кол кабыш кылышкан.
Иш-чарага калаа башчысы Айтмамат Кадырбаев баштаган жетекчилер жана жергиликтүү жашоочулар катышты. Белгилей кетсек, эс алуу багы жайгашкан Манас Ата аймактык кеңешинде элүү миңге жакын жашоочу бар.
