БИШКЕК, 11-сен. — Sputnik. Алгач Кыргызстандын президенти болом дегендердин саны 59га жеткен. Бирок ар кандай себептерден улам алардын көпчүлүгү четтетилди. Натыйжада жалпы 13 талапкер каттоодон өткөн.
Каттоодон өтүү үчүн президенттикке ат салышкандар бир катар шарттарды аткарышы керек болчу. Буга жаш курак (35тен өйдө), 30 миң кол тамга топтоо, соттолбогондугу тууралуу маалым кат, мамлекеттик тилди билүүсү жана күрөөгө 1 миллион сом коюу талаптары кирген.
Анткен менен бардык талапкерлер президенттик жарышка катышат деп кепилдик берүү мүмкүн эмес. "Президентти жана Жогорку Кеңештин депутаттарын шайлоо" жөнүндөгү мыйзамда кайсы учурда талапкер каттоодон айрылып калышы мүмкүн экени жазылган.
- Эгер талапкер соттолгонун жашырып, соттун чечими күчүнө кирген болсо же жарандыгынан айрылып калса жарыштан четтетилет. Дагы бир себеп — талапкердин өлүмү болуп эсептелет.
- Талапкерди каттоо шайлоо күнүнө беш күн калганда жокко чыгарылышы мүмкүн. Буга төмөнкү факторлор себеп:
- Талапкер президенттикке талапкерлигин өз каалоосу менен алып салуу арызын бергенде;
- Талапкер шайлоо кампаниясын шайлоо фондунан сырткаркы булактардан каржылай турган болсо;
- Талапкердин өкүлдөрү кызматтык абалынан пайдаланган фактылар далилденсе;
- Талапкердин жана анын өкүлдөрү үгүт иштерин жүргүзүү эрежелерин сактабаса;
- Талапкер же анын ишенимдүү адамдары, тарапташтары шайлоочулардын добушун сатып алууга аракет жасаган болсо.
Жогоруда аталган эрежелер так сакталбаса, талапкерлер жарыштан четтетилет.
