Сапар Исаков өзүнө эки кеңешчи дайындады. Алардын бири 26 жашта

БИШКЕК, 7-сен. — Sputnik. Юлия Калиниченко менен Бермет Турсункулова премьер-министрдин кеңешчиси болуп дайындалды. Бул тууралуу өкмөттүн маалымат кызматы билдирди.

Юлия Калиниченко 26 жашта. Борбор Азиядагы Америка университетин аяктаган. 2013-жылы Венгриянын борбору Будапешт шаарындагы Борбордук Европа университетинде европа тануу жана эл аралык мамилелер адистиги боюнча магистратурада окуган.

Буга чейин Москва шаарындагы "Институт отраслевого питания" автономдук коммерциялык эмес уюмунун долбоорлор жетекчиси кызматын аркалаган. Президенттин алдындагы мамлекеттик башкаруу академиясында эл аралык мамилелер жана уюштуруу иштери бөлүмүн жетектеген. Улуттук институттун стратегиялык изилдөөлөр боюнча координатору жана Борбор Азиядагы Америка университетинин Тянь-Шань аналитикалык борборунда изилдөө долбоорунун координатору болуп эмгектенген.

Англис жана француз тилдеринде эркин сүйлөйт.

Бермет Турсункулова 41 жашта. Доцент, саясий илимдердин кандидаты, билим берүүнүн отличниги.

Кыргызстан эл аралык университетинин бүтүрүүчүсү. 1999-жылы Венгриянын борбору Будапешт шаарында Борбордук Европа университетинде магистратураны аяктаган.

Буга чейин Борбор Азиядагы Америка университетинде академиялык маселелер боюнча вице-президент, билим берүү жана илим министринин орун басары, "Борбор Азия жана Монголия — жарандык билим берүү долбоору" программасынын директорунун орун басары болуп иштеген.

Англис, француз, түрк жана венгер тилдерин билет.