БИШКЕК, 7-сен. — Sputnik. КР өкмөтүнүн аппаратында жарандардын сын-пикирлери менен кайрылууларын карай турчу атайын бөлүм түзүлөрүн премьер-министр Сапар Исаков министрлер менен болгон жыйында билдирди.
Өкмөт башчы ведомстволордун башчыларына атайын бөлүмдө иштөө үчүн өз өкүлдөрүн көрсөтүүнү суранды. Алар элден келген сын-пикирлерди карап, ага ыкчам жооп кайтарып турушат.
"Силердин өкүлдөрдүн дүйнө таанымы кеңири болушу керек. Алардын англис тилин билгени жакшы. Биз айтылган ар бир эскертүүгө жооп беребиз. Эгер айтылган сындар болсо биз алар менен макул болуп же элге өзүбүздүн позицияны түшүндүрүп беришибиз керек", — деди Исаков.
Өкмөт башчы ошондой эле "Жаңы доорго кырк кадам" программасын ишке ашырууда алгачкы иштер жасалып жатканын баса белгиледи. Ал андан сырткары, министрлерди тез арада интернет колдонууну жакшы өздөштүрүп, отчетторду да электрондук форматта даярдоого чакырды.
Исаков өкмөт мүчөлөрүнө Мамлекеттик каттоо кызматы жана Маалыматтык технологиялар мамлекеттик комитети менен биргеликте жаңы технологияга өтүүнү уюштуруу керектигин айтты.
