БИШКЕК, 31-авг. — Sputnik. Көк бөрү боюнча президенттик кубокту "Достук" командасы утуп алды. Бул тууралуу Жаштар иши, дене тарбия жана спорт мамлекеттик агенттиги билдирди.
Маалыматка ылайык, финалдык оюндар 30-31-август күндөрү Чолпон-Ата шаарындагы ат майданында өтүп, төрт команда күч сынашты. Анда Оштун "Достук" командасы Таластын "Мурасын" 4:3 эсебинде утуп, кубокко ээ болду. Ал эми үчүнчү орунду Сокулук районунун "Биримдиги", төртүнчүнү Аламүдүн районунун "Арашан" командасы алды.
Оюндун жыйынтыгы менен биринчи орунга 500 миң, экинчи орунга 250 миң жана үчүнчү орунга 100 миң сом тапшырылып, "Достук" командасынын оюнчусу Байыш Ниязов мыкты оюнчу деп аталды.
Кошумчалай кетсек, мелдешке өлкө аймактарынан 11 команда катышты.
