БИШКЕК, 10-авг. — Sputnik. Россия Кыргызстанга АН-26 эки аскер учагын салтанаттуу түрдө тапшырды.
КР Куралдуу күчтөрүнүн Генералдык штабынын жетекчиси Раимберди Дүйшөнбиев авиациялык техника кыргыз тарапка эки мамлекеттин башчыларынын макулдашуусунун негизинде кайтарымсыз жардам иретинде берилгенин баса белгиледи.
"Бул авиациялык техниканы алуу маселесин ишке ашырууга эки өлкөнүн ортосунда аскер тармагы боюнча түзүлгөн мамиленин жогорку деңгээлге чыгышы себеп болду", — деди Дүйшөнбиев.
Россиянын коргоо министринин орун басары Александр Фомин Россия мындан ары да аскердик жана аскердик-техника жаатында байланышты чыңдоого көңүл бурарын айтты.
Куралдуу күчтөрдүн генералдык штабы Ан-26 Аскердик-транспорттук учактары машыгууларды жана атайын операцияларды өткөрүүдө жүктөрдү жана өздүк курамды ташууга, атайын багыттагы бөлүкчөлөрдү десанттык түшүрүүлөргө, аба чалгындоосун жана бомба таштоого байланышкан тапшырмаларды аткарууда аскерлердин мүмкүнчүлүктөрүн арттырарын баса белгиледи.
