БИШКЕК, 8-авг. — Sputnik. Президент Алмазбек Атамбаев Куралдуу күчтөрдүн Генералдык штабынын башчысы Раимберди Дүйшөнбиевди кабыл алды. Бул тууралуу өлкө башчынын маалымат кызматы билдирди.
Жолугушуунун жүрүшүндө Дүйшөнбиев өлкөнүн Куралдуу күчтөрүн чыңдоо жана мындан ары өнүктүрүү боюнча көрүлүп жаткан чаралар, башкаруу органдарын оптималдаштыруу боюнча жүргүзүлүп жаткан иштердин негизги жыйынтыктары туурасында маалымат берди.
Ал ошондой эле Кыргызстанга аскердик-техникалык жардам көрсөтүүнүн алкагында Россия тарабынан берилген аскердик-техникалык эки учактын келгендиги туурасында маалымдады. Учурда Кыргызстанга учакты расмий өткөрүп берүүнү уюштуруу болжолдонуп жатканын кошумчалады.
Белгилей кетсек, буга чейин Россия Кыргызстанга Ан-26 үлгүсүндөгү эки учак берери кабарланган.
Атамбаев мамлекеттин тышкы чек араларын чыңдоо жана коргонуу жөндөмдүүлүгүн арттыруу керектигин айтты.
