Белгилей кетсек, UFC (Ultimate Fighting Championship) — спорттук мушташтын аралаш түрү боюнча беттешүүлөрдү өткөргөн кадыр-барктуу уюм. Башкы кеңсеси Лас-Вегас шаарында жайгашкан. Учурда ар бир жеке кармашка чыккан спортчунун аруу тилеги дал ушул уюмда кыл чайнашуу.
Беш жашында башталган спорт. Валентина Шевчкенконун апасы Елена Шевченко таэквондо боюнча кара курдун ээси, эжеси Антонина көрүнүктүү спортчу. Андыктан кыз алма сабагынан алыс түшкөн эмес. Беш жашынан тарта "Фучик" сейил багындагы таэквондо секциясына барып, машыктыруучу Павел Федотовдун колунан тарбиялана баштаган.
Алгачкы мелдештерине алты жашынан тарта чыга баштаган. 12 жашында муай-тай боюнча өзүнөн он жаш улуу спортчу менен алгачкы профессионалдык беттешин Орусияда өткөрүп, жеңишке жеткен. Ошондон тарта машыктыруучусу “Ок” деген каймана ат берген.
2003-жылы. Түштүк Кореяда алгачкы жолу ММА боюнча Дүйнө чемпиондугун жеңип, ошол эле жылы тай боксу боюнча ИФМА версиясы боюнча Дүйнө биринчилигин утуп алган.
2005-жылы. Орусиянын Сочи шаарына барып, ал жактан тай боксу, бокс жана ММА менен машыгууну улантып, 4 жолу тай боксу боюнча Дүйнө чемпиондугун багынткан.
2015-жыл. UFCге ачылган жол. Тажрыйба алмаштыруу максатында Латын Америкадагы Перу шаарына көчүп кеткен. Балиде эс алууда жүргөндө менеджери Роджер Аллен UFC уюмунун мелдешине чыгууну сунуштаган.
Алгачкы тажрыйба. Биринчи ирет уюмдун алкагында Strikeforce чемпиону болгон Сара Кауфманды үч раунддун жыйынтыгында жеңип алган. Бул жеңиштин артынан UFC жетекчиси Дана Уайт аталган уюмда дагы 7 беттеш өткөрүү келишимин сунуштаган.
Мушкер кыздардын тиреши. Ушуга чейин UFC уюмунда төрт беттеш өткөрүп, үчөөсүндө жеңип, бирөөсүндө утулуп калган. Анда бразилиялык Аманда Нуньеске жеңилсе, тайбоксчу Холли Холмду, венесуэлалык Жулианна Пеньяны жер сүздүргөн. Холли Холмду утуп алгандан кийин Шевченко Аманда Нуньести реваншка чакырган. Бирок, 2017-жылы 8-июлда кармашка саналуу сааттар калганда Нуньестин ден соолугу начарлап ооруканага түшкөн. Эми спортчу кыздардын кыл чайнашы 9-сентябрда болушу күтүлүүдө.
Учурда — UFC жылдызы. Валентина Шевченко тай боксу жана К-1 версиясы боюнча Дүйнөнүн 17 жолку чемпиону, тай боксу боюнча аялдар арасында Дүйнөнүн мыкты спортчусу наамынын ээси. UFC уюмунун 62 килограммга чейинки салмак категориясынын рейтингинде 1-орунда.
