БИШКЕК, 9-июл. — Sputnik. Кыргызстандык Валентина Шевченко менен бразилиялык Аманда Нуньестин беттеши болбой калды. Бул тууралуу Шевченко өзүнүн Instagram баракчасы аркылуу билдирди.
Ал атаандашы ден соолугуна байланыштуу рингге чыкапай калганын жазган.
“Мен 100 пайыз даяр болчумун. Мелдешке мыкты формада чыгуу үчүн үч ай машыккам. Нунес салмак түшүрүүдө жаңылыштык кетирип алгандыктан ооруканага жаткырылды. Ал салмагын бат түшүрүп кайра топтогусу алгысы келген. Кесепети ушундай болуп калды. Анткен менен медициналык комиссия Нунести рингге чыгууга уруксат берген, бирок ал өзү баш тартып койду. Бул менин үчүн аябай өкүнүчтүү”, — деп жазган Шевченко.
Ошондой эле ал аны колдоо үчүн жада калса Лас-Вегастан бери келген жалпы күйөрмандарынын алдында ыңгайсыз болуп жатканын айтып UFC башка күндү белгилеп берүүсүн күтөрүн билдирген.
Былтыркы жылдын март айында Нуньес менен Шевченко UFC 196 мелдешинде рингге чыгып, утушка бразилиялык спортчу жеткен.
"Ок" деген каймана ат менен белгилүү болгон Валентина Шевченко да буга чейин эки таймаш өткөрүп, экс-чемпион Холли Холмду, андан соң Жулианна Пеньяны чөгөлөткөн.
Андан соң рингде сөз сүйлөгөн Валентина учурдагы чемпион Нуньес менен беттешүүгө даяр экенин айткан. Ага жооп кылып сөз алган Нунес "Сен мени жеңе албайсың. Сенден күчтүү экендигимди дагы бир ирет далилдеп, сазайыныңды берем" деген. Ал эми Шевченко атаандашын этият сүйлөөгө чакырып, “баары тескери болуп калбасын” деп эскерткен.
