БИШКЕК, 20-июл. — Sputnik. "Саякбай" тасмасы Эл аралык Монреаль кинофестивалына катышаарын фильмдин режиссеру Эрнест Абдыжапаров Sputnik Кыргызстан агенттигинин кабарчысына билдирди.
"Аталган фестивалга Кыргызстандын атынан "Курманжан датка", "Асман алдында", "Ата керээзи" тасмалары катышкан. Чындыгында биз манасчылык өнөр кыргыздарга гана тиешелүү болгондуктан, чет элдиктерге кызыгуу жаратпаса керек деп күмөн санаганбыз. Бирок бизге бүгүн чакыруу келди. Кыргыздардын өзгөчө дүнүйөсүн дүйнөгө маданиятыбыз аркылуу таанытабыз деп кубанып турган чагыбыз", — деди Абдыжапаров.
"Саякбай" тасмасы Кыргызстанда 31-август күнү эгемендүүлүктүн 26 жылдыгына карата көрсөтүлөт.
Буга чейин Канаданын Монреаль шаарында өткөн кинофестивалда Дальмира Тилепбергенованын "Асман алдында" тасмасы калыстар тобунун атайын сыйлыгына, режиссерлор Бакыт Мукул менен Дастан Жапар уулунун "Ата керээзи" фильми "Алтын зенитке" ээ болгон.
Тасмасын басымдуу бөлүгү улуу манасчынын туулуп өскөн жери Тоң аймагында тартылган.
