БИШКЕК, 25-июн. — Sputnik. Режиссер Эльнура Осмоналиеванын "Сейде" тасмасы Москвадагы кинофестивалга катышат. Бул тууралуу Кинематографисттер союзунан билдиришти.
Маалыматка ылайык, 39-жолу өтүп жаткан эл аралык кинофестиваль 22-29-июнь күндөрү Россиянын борбор шаарында болот.
"Сейде" тасмасы "Кыска метраждуу тасма: Панорама" программасынын алкагында көрсөтүлөт", — деп жазылат маалыматта.
Кыргызстандык кино буга чейин да көптөгөн эл аралык фестивалдарга катышып келген. Өткөн жылдын ноябрь айынын башында Түштүк Кореяда өткөн "Азиана" кинофестивалында баш байгеге татыса, ага чейин Канн фестивалындагы кыска метраждуу тасмалар программасына кирген.
14 мүнөткө созулган кино картина алыскы айылда жашаган Сейде аттуу кыз менен анын жакшы көргөн аты туурасындагы окуяны баяндайт.
