Жапалакта жок кылынчу арактардын баары төлөнгөн. Бул тууралуу айыл тургуну Мунузкан Тойчиева Sputnik Кыргызстан агенттигинин кабарчысына билдирди.
Эске сала кетсек, Оштун Жапалак айылында дүкөндөрдө сатылган арактарды жок кылуу чечими кабыл алынып, учурда демилге ишке ашырылууда.
"Жапалак айыл аймагында сергек жашоо образын түзүү үчүн айылдагы арактарды жок кылууга көмөктөшүп жатабыз. Эне катары таза балдарды өстүргүбүз келет. Буюрса демилге колдоо таап, ишке ашууда", — деди Тойчиева.
Ал дүкөндөрдөгү ичимдиктер жергиликтүү ишкерлер тарабынын сатып алынып, жок кылынаарын кошумчалады.
Эске сала кетсек, мындан бир нече күн мурда Жапалакта кайгылуу окуя болгон. Ичип алды делген 83 жаштагы абышка кемпири менен кер-мур айтыша кетип, бычак менен сайып жиберген. Анын кесепетинен 79 жаштагы байбичеси кансырап каза болгон.
