БИШКЕК, 19-июл. — Sputnik. Швейцариянын альп тоолорундагы мөңгүлөрдөн 75 жыл мурун жоголгон жуптун сөөгү табылды. Бул тууралуу РИА Новости агенттиги Рейтерге таянуу менен жазып чыкты.
Ага ылайык, 1942-жылы Шандолен айылынын тургундары Марселен жана Франсин Дюмулендер уй сааганы тоого чыгып, ошол бойдон дайынсыз жоголгон.
"Ле-Дьяблере курортунун жанындагы мөңгүдөн эки адамдын сөөгү табылган. Алардын кийимдери экинчи дүйнөлүк согуштун убагына таандык болуп, сөөгү жана документтери жакшы сакталган", — деп жазылат маалыматта.
Маркумдардын 79 жаштагы кичүү кызы ата-энесин көп жылдан бери издеп келгенин айтып, алдыда ДНК-тест болоорун кошумчалаган.
