БИШКЕК, 3-июл. — Sputnik. Кыргызстан Түркияда өткөн менталдык арифметика боюнча эл аралык олимпиадада биринчи орунду ээледи. Бул тууралуу "Академия роста" интеллектуалдык өнүгүү борборунан маалымдашты.
Олимпиадага Россия, Украина, Түркия, Казакстан, Болгария, Азербайжан жана Молдовадан 292 окуучу катышкан.
Ал эми Кыргызстандын атынан Бишкек шаарынан 10 жаштагы Милана Максутова, Новопавловкадан 7 жаштагы Адилет Абакиров жана Таластан 9 жаштагы Айсезим Облусбекова барган. Алардын бардыгы өз курак категориясы боюнча биринчи орунду камсыздашты.
Менталдык арифметика — балдардын интеллектуалдык жөндөмдүүлүгүн өнүктүрүүчү жогорку эффективдүү программа. Анын негизги максаты — эс тутумду, логикалык ой жүгүртүүнү жакшыртуу болуп эсептелет.
Менталдык арифметика менен балдар төрт жаштан тарта алектене алышат.
