Жайлоогүл болуп кала жаздаган Нурзат
Нурзатты атасы Токтосунов Темирболот 52, апасы Токтосунова Бүбүш 44 жашында көргөн. Сегиз бир туугандын кенжеси. Алар: Тогузбай, Теңизбай, Доктурбай, Мукамбет, Гүлнара, Максат, Элмира жана Нурзат.
Казанга жасалган оромо, жайлоодогу каникул
Мектепте активдүү окуучулардын катарын толуктап, 7-11-класска чейин президент болгон. Жайкысын үч ай жайлоодо жүрүп, уйду, бээни саап, казанга тамак жасаганын көп эстейт. "Тогуз жашымда биринчи жолу казанга оромо жасап, чөптөн келе жаткан байке-жеңелеримди тосуп алып таң калтыргам",— дейт ал.
Билими
Мектепте өткөрүлгөн кыргыз тили боюнча олимпиаданы жеңип алып, Эл аралык Ататүрк-Алатоо университетинин эр аралык мамилелер факультетине тапшырган. 2012-жылы Бүбүсара Бейшеналиева атындагы Искусство университетинин социалдык маданий ишмердүүлүк факультетин бүтүргөн. Учурда Ишенаалы Арабаев атындагы окуу жайда аспирантурада окуп, эки жылдан бери "Манас" эпосундагы символикалар боюнча кандидаттык ишин жазууда.
Кызыл тилге салынган алып баруучулукка карай жол
Телевидениеге кастинг аркылуу келип, алып баруучулукка 150 кыздын арасынан суурулуп чыккан. 2005-жылы 25-февралда биринчи жолу эфирдин босогосун аттаган. Улуттук хит-парад музыкалык программасында жарым жыл иштегенден кийин жеке фирмада эмгектенип калат. Андан соң "Браво" программасында сегиз ай иштеген.
Окуучусу күйөөсүнө айланган
Нурзат Токтосунова "Нур" алып баруучулар мектебинин негиздөөчүсү. 2012-жылы болочок жолдошу Максат Надырбеков академияга окуганы келет. Кийин Нурзат экөө кесиптешке айланып, бара-бара көңүлдөрү төп келип, 2015-жылы 20-июнда баш кошкон.
Нурзат тууралуу биз билип-билбеген чындыктар
- 6 жашынан бери чачын узун кылып алып жүрөт
- Бою 165 см., салмагы 56 см. болгону менен, бутунун өлчөмү 35 сантиметр
- Мектепте бир да жолу бештен бөлөк баа алган эмес
- Чыгармачылыктагы алгачкы гонорарын 2005-жылы Ошко концерт менен барып, коомдук ишмер Кылычбек Султановдун колунан 500 сом алган.
- Корккону — бийиктик.
- Күндөлүк жазат. Журналистика тармагына кызыккан жаштарга күндөлүк жазганды сунуштайт.
- Параплан менен учууну кыялданат. Спорттун сууга сүзүү түрү менен машыгат.
