БИШКЕК, 30-июн. — Sputnik. Өкмөт Нарындын Ак-Талаа районундагы Акталчат — Казарман жолунун көпүрөсүн реконструкциялоого 50 миллион сом бөлө турганын премьер-министр Сооронбай Жээнбеков аталган облуска барганда айтты.
Транспорт жана жолдор министри Жамшитбек Калиловдун маалыматында 140 метрлик көпүрө өткөн кылымдын 60-жылдарында курулган. Быйыл жаздан бери суунун деңгээли көтөрүлгөндүктөн көпүрөнүн түркүктөрү кооптуу абалга кептелген. Министрлик тарабынан комиссия түзүлүп, ал үч түркүктү суу каптап кеткенин аныктаган. Мындан улам көпүрө убактылуу жабылган.
Жээнбеков жергиликтүү эл менен жолугуп жатып, көпүрөнүн оңдолушуна убакыт керектигин белгиледи. Муну менен бирге тиешелүү мекемеге курулуш иштерин сентябрь айына чейин аяктап, колдонууга берүү тапшырмасын койду.
Эскерте кетсек, өкмөт башчынын бүгүнкүгө Жалал-Абад облусуна да иш сапары пландалган.
