БИШКЕК, 29-июн. — Sputnik. Орозо айында элден чогултулган битир-садаганын эсебинен Өзгөндөгү жана Чоң-Алайдагы табигый кырсыктардан жабыркаган 8 үй-бүлөгө турак жай тургузуп беришет. Бул тууралуу муфтияттын маалымат кызматынан кабарлашты.
Билдирүүгө ылайык, бүгүн, 29-июнда Максат ажы Токтомушев баштаган муфтияттын өкүлдөрү жана облус жетекчилиги кырсык чалган райондорго барып эл менен кезигишкен.
"Жолугушууда битир-садагадан түшкөн каражатка Өзгөндөгү жер көчкүдөн жабыркаган төрт, Чоң-Алайдагы жер титирөөдөн үйлөрү жарактан чыккан төрт үй-бүлөгө турак жай салып берүү убадаланды. Айылдыктар өздөрү кеңешип аз камыз болгон үй-бүлөлөрдү көрсөтөт. Бул үйлөр чыныгы муктаждарга салынат", — деп айтылат билдирүүдө.
Эскерте кетсек, май айында Чоң-Алайда улам кайталанган жер титирөөнүн кесепетинен 618 турак жай жарактан чыгып, айрымдары чатырларга көчүрүлгөн.
Өзгөндүн Аюу айылында 29-апрелде жер көчүп алты үй-бүлөдөн 24 кишини басып калган. Ага удаа Жалпак-Таш айыл аймагындагы 61 түтүн жашаган айылда сүрүлүп жаткан жер көчкү 10-майга чейин 45 турак жайды жарактан чыгарган. Кырсык чалган айылдыктар чатырларга көчүп чыккан. Ничке-Сай айылынын Топ-Жаңгак участкасында 26-март күнү таңга жуук жер көчкү жүрүп, төрт балалуу үй-бүлөнү басып калган.
