БИШКЕК, 16-июн. — Sputnik. Ак-Талаа районунда узундугу 140 метр болгон көпүрө чөгүп баратат. Бул тууралуу жергиликтүү тургундар Sputnik Кыргызстан агенттигине кабарлашты.
Маалыматка ылайык, Нарын дарыясынан өткөн көпүрөнүн эки тирөөчү акыркы он күн ичинде 40-45 сантиметрге чөгүп кеткен. Буга байланыштуу азыр көпүрө аркылуу автоунаа менен өтүүгө чектөө коюлду.
Нарын ОИИБдин Кайгуул милиция бөлүмүнүн жетекчисинин орун басары Тилек Оторовдун айтымында, учурда жеринде жолчулар менен Кайгуул милициясы иштеп жатат.
"Азыркы учурда көпүрөгө күзөт коюлду. Милиционерлер оор жүк ташуучу унааларды өткөрүүгө чектөө киргизип, абалды көзөмөлдөшүүдө. Ошондой эле адамдардын коопсуздугу үчүн жарандарды жөө өткөзүп жатышат", — деди Оторов.
№15 Жол тейлөө ишканасынын жетекчиси Ажыбай Исаев маселе менен атайын комиссия иштеп жатканын белгиледи.
"Майдын аягында атайын комиссия келип көпүрөнүн абалы менен таанышкан. Анда аны жаңы куруп, эки тирөөчүн оңдоо керек деген сунуш беришкен. Анын негизинде адистерге тапшырма берилген. Комиссия эми дагы келип ишин улантат. Азыр дагы мониторинг жүргүзүп жатабыз. Акыркы он күндө Нарын дарыясында аккан суунун көлөмү көбөйүп көпүрө ошондон улам да тез чөгүп жатат", — деди Исаев.
Аталган көпүрө 1967-жылы курулган. Кийин 1981-жылы бузулуп, кайра оңдолуп колдонууга берилген. Андан бери ал жерде курулуш иштери аткарылган эмес.
