БИШКЕК, 6-июн. — Sputnik. Бишкекте коомдук транспорттун акысы көтөрүлүшү мүмкүн. Бул тууралуу Бишкек мэриясынын шаардык транспорт башкармалыгынын башчысынын орун басары Нурлан Атыканов Sputnik Кыргызстан радиосуна маек куруп жатып билдирди.
Анын айтымында, бааны көтөрүү боюнча сунуштар мурун эле түшкөн.
"Коомдук транспорттун кызмат акысын көтөрүү боюнча маселе жакынкы күндөрү каралат. Бишкек шаардык кеңештин депутаттары да маселени кароого убакыт келип жеткенин айтып, сунуштарды алып келгиле дешти. Андыктан баа көтөрүлүшү мүмкүн. Бирок качан, канча сомго көтөрүлөрүн азыр айта албайм", — деди Атыканов.
Ал аталган маселе боюнча жарандык коомдун активисттери катышкан тегерек столдор болуп, элдин пикири эске алынарын кошумчалады.
Белгилей кетсек, учурда маршрутканын баасы 10 сом, саат 21:00дөн тарта 12 сом. Ал эми автобус менен троллейбустарда жол кире 8 сом.
