БИШКЕК, 31-май — Sputnik. Парламенттин маалымат кызматы журналист Алтынай Жалмамбетовага байланыштуу жол кырсыгына комментарий берди.
30-май күнү Toyota үлгүсүндөгү унаанын айдоочусу маалымат агенттиктеринин биринде иштеген журналист кызды койдуруп кеткен. Натыйжада жабырлануучунун акыреги сынган. Айдоочу окуя болгон жерден качкан эмес. Айрым ЖМКлардын маалыматына караганда, ал өзүн Бекзат деп тааныштырып, парламенттин аппаратында иштей турганын билдирген.
Жогорку Кеңештин маалымат кызматы парламент кызматкерлеринин арасында бир гана Бекзат Мамытов деген жаран бар экенин билдиришти.
"Анын айтымына караганда, ал 30-май күнү эч кандай жол кырсыгына кабылган эмес жана бул окуяга тиешеси жок", — деп маалымат кызматынан кабарлашты.
Ошондой эле учурда Мамытов иш ордунда экенин белгилешти.
