Путин Түркияга карата киргизилген экономикалык чаралардын айрымдарын жокко чыгарды

БИШКЕК, 31-май — Sputnik. Россиянын президенти Владимир Путин Түркияга карата киргизилген экономикалык чаралардын айрымдарын жокко чыгаруу боюнча жарлыкка кол койду. Бул тууралуу РИА Новости агенттиги Кремлдин маалымат кызматына таянуу менен билдирди. 

Путин кол койгон жарлыкка ылайык, түркиялык кызматкерлерди жумушка алуу жана түрк компанияларынын бир катар тармактарда иштөөсүнө салынган тыюулар алынды.

Россия президенти ошондой эле Тышкы иштер министрлигине Анкарага 2010-жылдагы эки мамлекеттин жарандарынын өз ара кирип чыгуусу тууралуу кол коюлган келишим жарым жартылай кайтадан иштеп баштаганы боюнча кабардар кылууну тапшырды. Андан сырткары, Россияга визасыз кире алчу түркиялык жарандардын тизмесин кеңейткен.

Эске салсак, расмий Москва 2016-жылдын 1-январынан тарта Түркиядан келүүчү бир катар продукцияларга тыюу салган. Мындай кадам түрк аба күчтөрүнүн Сириянын аймагында Су-24 учагын атып түшүрүүсүнө жооп катары жасалган.

Быйыл май айынын башында Владимир Путин түрк президенти Режеп Тайип Эрдоган менен жолуккан. Жолугушуудан кийин Путин тараптар соода-экономикалык жааттагы чектөөлөрдү "комплекстүү чечүү" боюнча сүйлөшүүгө жетишилгенин айткан.