БИШКЕК, 31-май — Sputnik. Бишкекте жол ортосуна чыгып алып мушташкан айдоочулар кармалганын Бишкек шаардык Кайгуул милиция башкармалыгынан кабарлашты.
Кечээ, 30-майда Шабдан баатыр менен Анкара көчөлөрүнүн кесилишинде Lexus 570 үлгүсүндөгү автоунаа батышты карай бара жатып жолдун каршы тилкесине чыгып алган. Анда Toyota жеңил унаасы өз тилкесинде келе жатып маңдай-тескей туруп калышкан. Жыйынтыгында ал жерде жол тыгыны пайда болгон. Каршы тилкеге чыгып алган айдоочу мушташканга чейин барган.
"27 жаштагы Toyota үлгүсүндөгү унаанын айдоочусу менен 34 жаштагы Lexus 570 унаасынын айдоочусу кармалды. Алар коомдук тартипти бузгандыктан административдик жоопко тартылып, ар бири 1500 сомдон төлөмөй болушту", — деп айтылат маалыматта.
Эки айдоочуга эскертүү берилип, үйлөрүнө кое берилген.
