БИШКЕК, 22-май — Sputnik. Балбан кыз Айсулуу Тыныбекова Бакуда өтүп жаткан Ислам тилектештик оюндарында алтын медаль тагынды. Бул туурасында мелдештин расмий сайында айтылат.
Тыныбекова жана дагы эки спортчу кыз 58 килограммга чейинки салмак категориясында ат салышкан. Финалда Тыныбекова азербайжандык Алена Колесник менен күрөшүп, аны 5:3 эсебинде жеңип алды. Ошентип кыргызстандык спортчу кыз алтын медалды утуп кетти.
IV Ислам тилектештик оюндары Баку шаарында 12 майда башталган, ал бүгүн аяктайт. Кыргызстандын намысын коргогон спортчулар спорттун 11 түрү боюнча катышып жатат.
Эскерте кетсек, буга чейин, 13-майда Айсулуу Тыныбекова кыз-келиндер арасындагы күрөштө Азиянын чемпиону болгон. Биринчи титулун ал Таиландда 2016-жылдын февраль айында жеңип алган.
