БИШКЕК, 16-май — Sputnik. Бишкек шаарынын Октябрь райондук прокуратурасы №18 үй-бүлөлүк медициналык борбордун жетекчилерине карата кызмат абалынан кыянаттык менен пайдаланган деп кылмыш ишин козгоду. Бул тууралуу Башкы прокуратуранын маалымат кызматы билдирди.
Аталган медициналык борбордун жетекчилери бухгалтерияда иштегендер менен жең ичинен сүйлөшүп алып, кассирдин атына банктан эсеп ачып, ага 2013-жылдан 2017-жылга чейин ай сайын бюджеттик акчадан 200 миң сом которуп турушкан. Андан кийин бул каражатты өздөрү алышкан.
Мындан сырткары, "КР саламаттык сактоо кызматкерлеринин маянасы жөнүндөгү" жобонун талаптарын бузуп, кызматкерлердин эмгек коэффицентин арттыруу менен негизсиз түрдө 82 миң 100 сом төлөнгөн.
Мыйзамсыз иш-аракеттердин жыйынтыгында мамлекетке 8 миллион 900 миң сомдон ашык зыян келтирилген.
Ишти тергөө Экономикалык кылмыштуулукка каршы күрөшүү кызматынын Бишкек шаары боюнча башкармалыгына тапшырылды.
