БИШКЕК, 5-май. — Sputnik. Токтогул районунун Социалдык фонд башкармалыгынын кызматкерлерине кылмыш иши козголду. Бул тууралуу Башкы прокуратуранын маалымат кызматы кабарлады.
Кылмыш иши Кылмыш кодексинин 304-беренеси (Кызмат абалынан кыянаттык менен пайдаланды) менен козголгон.
Белгилүү болгондой аталган башкармалыктын кызматкерлери пенсияга чыккан аялдын көзү өтүп кеткенин билип туруп, 2013-жылдын 1-июнунан 2016-жылдын 31-июлуна чейин ал аялдын банктык эсебине мыйзамсыз акча которуп турушкан. Түшкөн каражатты белгисиз адамдар алып турган", — деп жазылат маалыматта.
Башкы прокуратуранын маалыматына ылайык, бул иштер мамлекетке бир топ материалдык чыгым алып келген. Учурда тергөө иштери жүрүп жатат.
