БИШКЕК, 15-май — Sputnik. "Евровидение" эл аралык ыр сынагынын финалы учурунда сахнага чыга калып шымын чечкен украиналык пранкер Виталий Седюк айыпка жыгылат же беш жылга чейин эркинен ажыратылат. Бул тууралуу РИА Новости Украинанын ички иштер министри Арсен Аваковго таянуу менен билдирди.
Окуя "Евровидение-2016" сынагынын жеңүүчүсү Жамала ырдап жатканда болгон. Анда сахнага бир киши Австралиянын желегин кармап чыгып, шымын чечип ары-бери баскан.
Украинанын ички иштер министри Арсен Аваков өзүнүн Facebook социалдык тармагына 200 миллион кишинин көз алдында өзүнүн жылаңач жамбашын көрсөткөн украиналык пранкер Седюк экенин жазган.
Ал мындай кылыгы үчүн конкурстун коопсуздук кызматкерлери тарабынан кармалган, аларга каршылык көрсөткөн. Учурда ал соттун чечими чыкканга чейин 72 саатка убактылуу кармоо жайына киргизилди.
Айрым ЖМКлардын жазышынча Седюк 2016-жылы Париждеги Мода жумалыгында Ким Кардашьяндын жамбашын өбүүгө аракет кылган. Ал эми 2012-жылы Москва шаарында Men in Black 3 тасмасынын бет ачарында Уилл Смитке жакын келип "Мен сиздин эң чоң фанатыңызмын" деп айтып, беттен өбүүгө аракет кылган. Актер аны жаакка муштап калууга жетишкен.
