БИШКЕК, 12-май — Sputnik. 2017-жылга карата алтындын запасы боюнча түзүлгөн дүйнөлүк рейтингде Кыргызстан бир сапка ылдыйлап 83-орунду ээледи. Бул тууралуу World Gold Council эл аралык эксперттик уюмдун жаңы отчетунда маалымдалат.
Маалыматка ылайык, учурда Кыргызстандын ээлигинде 4,9 тонна алтын бар (бул жалпы алтын валюта резервинин 9,9 пайызын түзөт). Ал эми былтыркы жылдын октябрынан бери өлкө өз запасын 0,5 тоннага көбөйтө алган.
Постсоветтик өлкөлөрдүн ичинен алтыны көп өлкөлөрдүн алдыңкы катарында мурдагыдай эле Россия 1680,1 тонна менен жетинчи орунда келе жатат. Андан соң 267,7 тонна алтыны менен Казакстан турат. Белоруссия алдыңкы 50 мамлекеттин катарына кирип, 40,7 тонна алтыны менен 48-орунду ээлеген.
Рейтингде алдыңкы беш орунда турган лидер мамлекеттердин тизмеси:
- АКШ — 8133,5 тонна;
- Германия — 3377,9 тонна;
- Италия — 2451,8 тонна;
- Франция — 2435,9 тонна;
- Кытай — 1842,6 тонна.
Алтын боюнча дүйнөлүк кеңеш (World Gold Council) — 1987-жылы баалуу металлга болгон талапты жаратуу үчүн негизделген уюм.
