Европада кызылча оорусу күч ала баштады. Министрлик кыргызстандыктарга эскертет

БИШКЕК, 27-апр. — Sputnik. Жыл башынан бери Европа өлкөлөрүндө жугуштуу кызылча илдетине чалдыккандардын саны өсүп жатканын Саламаттыкты сактоо министрлигинин маалымат кызматы билдирди.

Бул тууралуу 26-апрелде Оорулардын алдын алуу жана көзөмөлдөө европалык борборунун расмий сайтына жарыялангандан кийин белгилүү болгон.

Республикалык иммундук профилактика борбору Ооруларды алдын алуу жана көзөмөлдөө европалык борборунун маалыматына таянуу менен кызылча оорусунан жабыркагандардын жалпы саны төрт миңге жеткенин маалымдады.

Кызылча оорусу Австрия, Румыния, Болгария, Бельгия, Чехия, Венгрия, Франция, Германия, Швеция, Италия, Португалия, Исландия, Испания, Швейцария өңдүү 14 өлкөдө тарап, алардын басымдуу бөлүгү Румыния менен Италияда катталган. Кээ бирлери мындан ажал таап жатканы да айтылат. Ошондой эле мындай илдет медицина кызматкерлерине да жуга баштаган.

Ведомство кыргызстандыктарды аталган өлкөлөргө бараарда ушул кырдаалды эске алууга чакырат.

Ал эми саламаттыкты сактоо министрлиги өлкөдө кызылча жана кызамык оорулары боюнча абал туруктуу экенин билдирди. Ушул жылдын биринчи кварталынын жыйынытыгында Кара-Балтада кызылча менен ооруган бир бала катталса, Бишкекте жана Аламүдүн районунда экөө кызамык илдетине чалдыккан.