"Кыргызстандагы кыя өтпөй турган жерлер" деп аталган рубриканын алкагында окурмандарга Горький көчөсү, 135 дарегиндеги Ботаникалык бак (дендрарий) тууралуу маалыматты сунуштайбыз. Бакка кире бериштеги тактадан "Сиздерди ажайып өсүмдүктөр дүйнөсүнө чакырабыз" деген жазуу көзгө урунат.
Ботаникалык бактын ресурстук борборунун өкүлү Дмитрий Переясловскийдин айтымына караганда, бул жерде жыгач өсүмдүктөрүнүн 2000дей түрү бар.
Дендрарий илимий жай болгондуктан, анын ичинде өз алдынча ээн-эркин сейилдеп жүрө албайсыз. Бирок экскурсовод сизге жакшы жардамчы болот. Айтмакчы, бул жердин өзүнүн эрежелери бар.
Дендрарийдин аймагында гүлдөрдү үзүүгө, мөмөлөрдү, уруктарды чогултууга, козу карын терүүгө болбойт. Аймакта велосипед жана ролик менен жүрүүгө, от жагып, чылым чегүүгө тыюу салынган. 12 жашка чейинки балдарды сөзсүз түрдө чоңдор коштоп жүрүшү шарт. Бул жерге кызуу болуп келүүгө болбойт. Музыканы катуу чыгарып коюуга, пикник уюштурууга да тыюу салынат.
Дендрарийге кирүү үчүн чоң кишилер үчүн билеттин баасы 50 сом, окуучулар үчүн 20, ал эми кичине балдар жана улгайгандар үчүн 5 сом.
