БИШКЕК, 13-апр. — Sputnik. Ислам тилектештигинин IV оюндарына Кыргызстандын атынан 70 спортчу катышат. Бул тууралуу Жаштар иши, дене тарбия жана спорт боюнча мамлекеттик агенттигинен билдиришти.
Оюндар 12-22-май күндөрү Азербайжандын борбору Баку шаарында өтөт. Программага баскетбол, бокс, күрөш, суу полосу, волейбол, гандбол, дзюдо, зорхана, каратэ, жеңил атлетика, сууда сүзүү, сууга секирүү, стол тенниси, спорт гимнастикасы, атуу, теннис, таэквондо, оор атлетика, ушу, футбол жана көркөм гимнастика кирет.
Кыргызстандык спортчулар спорттун 11 түрү — сууда сүзүү, күрөш, дзюдо, бокс, ок атуу, көркөм гимнастика, жеңил атлетика, таэквондо, ушу саньшоу, волейбол, зорхана боюнча ат салышат.
Улуттук команданын катарында балбандар — Руслан Царев, Айсулуу Тыныбекова, сууда сүзүүчүлөр Денис Петрашов, Дарья Таланова, жеңил атлетчи Виктория Полюдина, дзюдочулар Отар Бестаев, Юрий Краковецкий жана башка белгилүү спортчулар бар.
