БИШКЕК, 13-апр. — Sputnik. Нарын облусунун Ат-Башы районундагы Ак-Сай өрөөнүнө барчу жол акыры кардан тазаланып, малчыларга гуманитардык жардамдар таратылууда. Бул тууралуу ӨКМ билдирди.
Белгилей кетсек, 12-14-март күндөрү Нарын облусунун Ат-Башы районундагы Ак-Сай аймагына кар аралаш бороон болуп, автожолдорду жаап калган. ӨКМ жолдор тазаланганга чейин аймакка өзгөчө кырдаал киргизген болчу.
"Ак-Сай өрөөнүндөгү малчыларга барчу жол ачылды. Тоолордун күңгөй беттериндеги кар эрип, мал жаюуга мүмкүнчүлүк түзүлдү. Ошондой эле 11-апрелде КР ӨКМден бөлүнгөн гуманитардык жардам Ак-Сай өрөөнүнө жеткирилип, 12-апрелде малчыларга таратылды", — деп айтылат маалыматта.
Кар калың жаагандыктан Ак-Сайдын алыскы аймактарына жетүү үчүн зооттолгон техника дагы тартылган.
