БИШКЕК, 6-апр. — Sputnik. Премьер-министр Сооронбай Жээнбеков 6-апрель күнү Ош аэропортундагы жаңыланган аэробекет комплексинин ачылышына катышканын өкмөттүн маалымат кызматынан кабарлашты.
Аэробекеттер жүргүнчүлөрдү комплекстик тейлөөгө багытталган.
Анын саатына жарандарды өткөрүү мүмкүнчүлүгү 450дөн 600гө өстү. Ал эми аянты 5 миң чарчы метрден 7 160 чарчы метрге кеңейтилген.
Премьер-министр Кыргызстан Борбор Азиянын борборунда жайгашып, эл аралык транзит катары потенциалы жогору экендигин белгиледи.
"Ош" эл аралык аэропортунун директору Талантбек Ысаков жүргүнчүлөрдүн агымы күчөгөндүктөн аэробекет комплексин кеңейтүү муктаждыгы пайда болгонун айтып берди.
"Аэробекеттин тардыгынан улам рейстердин санын көбөйтүү мүмкүн болбой келген. Бекет комплексин кеңейтүү жана жүргүнчүлөргө ыңгайлуу шарттарды түзүү муктаждыгы курч болуп турган", — деди Ысаков.
Аэропорттун жетекчиси учуп-конуу тилкесин дагы кеңейтүү боюнча пландарын айтып берди.
