БИШКЕК, 23-мар. — Sputnik. Улу Британиянын борбору Лондондо жасалган терактынын жоопкерчилигин "Ислам мамлекети" террордук уюму өз мойнуна алгандыгын РИА Новости жазып чыкты.
Окуя кечээ, 22-мартта Лондон убактысы боюнча саат 14:40та (Бишкек убактысы менен алганда 20:40) болгон. Унаа менен келе жаткан киши көпүрөдөн өтүп бара жаткан бир нече адамды коюп, парламенттин жанында турган полиция кызматкерине бычак урган. Аны экинчи полиция атып өлтүргөн. Укук коргоо органдары окуяны теракт деп аташты.
"Лондондогу терактыны Улуу Британиянын жараны жасаган. Ал буга чейин эле экстремисттик аракеттерди жасоого шектелип полициянын көңүлүн бурган. Бийлик анын ысымын атоого шаша элек. Террорчу менен байланышы бар делген дагы сегиз жаран кармалды", — деп айтылат маалыматта.
"Окуядан 12 британдык, үч француз, эки румын, бир поляк, немец, кытайлык, АКШлык, италиялык, ирландиялык, эки грециялык жана Түштүк Кореянын төрт жараны жаракат алган", — деп Мэй билдирди.
Ал ошондой эле жарадар болгон үч полиция кызматкеринин экөөнүн абалы оор экенин кошумчалады.
