БИШКЕК, 17-мар. — Sputnik. Ош облусунун Ноокат районунда 130 гектардан ашык жер Өзбекстандын жарандарына сатылып кетти деген маалымат ырасталган жок. Бул тууралуу Башкы прокуратуранын маалымат кызматы кабарлады.
Эскерте кетсек, үстүбүздөгү жылдын 2017-жылдын 9-январында Жаңы-Ноокат айылынын бир катар тургундары маалымат жыйында жер тилкесинин чет элдик жарандарга сатылып кеткендигин айтып, нааразылыкка чыгышкан.
Ошол эле күнү өкмөттүн Ош облусундагы өкүлчүлүк жердин сатылышы тууралуу маалыматты төгүндөгөн.
Жергиликтүү жашоочулар "жер тартыштыгын чечүүнүн ордуна 150дөй өзбекстандыкка үлүш жер берип койду" деп айыл өкмөт башчысы Нурмахаммад Йулчиевди айыпташкан. Ал эми Йулчиев нааразы тараптын маалыматын четке каккан.
Өкмөт жер сатылды деген билдирүүлөр чындыкка коошпой турганын айтып, маселени териштирүүнү Башкы прокуратурага тапшырган. Ош облустук ИИБ тарабынан такталбаган маалымат таркаткан жергиликтүү жашоочулар суракка чакырылып, териштирүү иштери жүргүзүлгөн.
Иликтөөнүн натыйжасында Өзбекстандын жарандарына жер тилкеси сатылды деген маалымат тастыкталган эмес.
