БИШКЕК, 17-мар. — Sputnik. Төрт күн мурда 212-маршруттук унаада баратып, жол кырсыгына кабылган жүргүнчүлөрдүн бири дагы бул окуя боюнча укук коргоо органдарына арыз жаза элек, бирок тергөө амалдары жүрүп жатат. Бул тууралуу Кайгуул милициясынын маалымат кызматынан Sputnik Кыргызстан агенттигине билдиришти.
Эске салсак, 13-март күнү Бишкектин Элебаев жана Карасаев көчөлөрүнүн кесилишинде эл ташыган маршрутка жеңил автоунаа менен кагышкан.
Жыйынтыгында алты адам ар кандай деңгээлдеги жаракаттарды алган.
"Маршруттун 27 жаштагы Т.У атту айдоочусу негизги жол менен келе жаткан жеңил унаага жол бербей койгон. Азыр бул иш боюнча тергөө иштери жүрүп жатат. Бирок жабыркагандар айдоочунун үстүнөн арыз жаза элек", — деп Кайгуул милициясынын маалымат кызматынын жетекчиси Таалай Бугубаев билдирди.
Маалыматка караганда, кырсыкка кабылган унаа "Лига" фирмасына тиешелүү болгон. Айдоочу аталган ишкананын бардык талаптарына жооп бергендиктен, жумушка алынып, иштеп жүргөн.
Айдоочунун жети жылдык стажы жана айдоочулук күбөлүгүндө эл ташуучу унааны башкарууга мүмкүнчүлүк берген "D" категориясы басылган.
Аталган кырсыктан жабыр тартып, тез жардам унаасы менен ооруканага жеткирилген алты адамдын бешөө дарыгерлерден тиешелүү жардамдарды алгандан кийин, үйлөрүнө жиберилгендигин Саламаттык сактоо министрлигинин маалымат кызматынан кабарлашты.
Маалыматка караганда, кырсыктан бишкектик 51 жаштагы Кенже Айдаралиева катуу жаракат алган. Анын жамбаш сөөгү сынгандыктан, алгач жандандыруу бөлүмүнө жаткырылган. Учурда травматология бөлүмүндө дарылануусун улантууда.
