БИШКЕК, 14-мар. — Sputnik. Сузак районунун Кызыл-Туу айыл аймагынын Соку-Таш айылында адырда жер көчкүнүн сүрүлүүсү байкалып, турак-жайларга кооптуулук жаратканын ӨКМ билдирди.
ӨКМдин райондук бөлүмүнүн башчысы, Мониторинг департаментинин башкы адиси жерине барып тактоо иштерин жүргүзгөн. Натыйжада жантаймада эки жеринен жер көчкү сүрүлгөндүгү аныкталган. Биринчи жер көчкүнүн көлөмү болжол менен 84 000 куб метр болсо, экинчиси 480 миң куб метрге жеткен. 10 турак-жайга кооптуу абал жаралган, анын ичинен эки үйгө болжол менен 250 метр жакындаган.
"Жакын аралыкта жайгашкан эки там мыйзамсыз түрдө курулгандыгы аныкталып, калган сегиз турак-жайдын ээлери 1994-жылы мамлекет тарабынан жер тилкелерин жана ссудаларды алышкан. Бирок, тилекке каршы, ушул күнгө чейин кооптуу аймакта жашап келишет", — деп айтылат маалыматта.
Адамдардын өлүмүнө жол бербөө жана өзгөчө кырдаалдын кесепеттерин алдын алуу максатында Кызыл-Туу жана Соку-Таш айылдарынын башчыларына кооптуу аймакта жашаган адамдарды башка коопсуз жерге көчүрүп чыгаруу боюнча эскертме берилди.
