БИШКЕК, 14-мар. — Sputnik. ӨКМдин Ош шаардык башкармалыгынын кызматкерлери жана Жарандык коргонуу комиссиясы кооптуулугу жогору болгон участкаларды жана объектилерди, ошондой эле сел, суу ташкындары жүрүүчү кооптуу тилкелерди жеринде иликтеди. Бул тууралуу министрликтин маалымат кызматы билдирди.
Ош шаарынын аймагында кооптуу делген 63 участкалар жана объектилер текшерилип, анын ичинен 27си сел, суу ташкындары жүрүү коркунучу жогору аймактар экендиги аныкталган.
"Жеринде актылар түзүлүп, тиешелүү кызматтарга калыбына келтирүү, оңдоп түзөө иш-чараларын жүргүзүү боюнча сунуштар берилди", — деп айтылат маалыматта.
Буга чейин Өзгөчө кырдаалдар министри Кубатбек Боронов жаз айларында күтүлүүчү сел ташкындарынын алдын алуу максатында ӨКМ башкармалыктарынын башчыларына тапшырма берген.
