Бөйрөк дарты суук тийген ооруларды убагында дарылабагандан, туура эмес тамактануудан улам пайда болот. Бул тууралуу Sputnik Кыргызстан агенттигине уролог Калдарбек Бахтахунов билдирди.
Анын айтымында, ар бир адам жылына бир жолу медициналык текшерүүдөн өтүп, бөйрөгүн текшертип же заарасын анализге берип турушу керек.
"Бөйрөк оорулары өз ичинен ар түрдүү болуп бөлүнөт. Анын ичинде гемодиализге жетип калган түрү гломерулонефрит деп аталат. Мында жөнөкөй эле ангина, скарлатина, пневмония ооруларынын микробдору убагында дарыланбай бөйрөккө, муундарга отурукташат. Мындан улам бөйрөктүн фильтрация жасаган функциясы иштебей, белокту кармай албай сыртка чыгара баштайт. Мындан сырткары ачуу, туздуу тамактарды, газдалган суу көп ичпеш керек", — деди Бахтахунов.
Дарыгер суюктукту жетиштүү көлөмдө ичип туруу пайдалуу экенин айтып, ал организмдеги зат алмашууну жакшыртаарын кошумчалады.
