БИШКЕК, 2-мар. — Sputnik. Ооруканада жаткан КТРК жетекчиси Илим Карыпбековдун ден соолугу жакшыра баштады. Бул тууралуу Саламаттык сактоо министрлиги билдирди.
Эске салсак, 1-мартка караган түнү Карыпбеков Бишкектеги Аалы Токомбаев көчөсү аркылуу Range Rover машинасын айдап келе жатып, жол четинде турган түркүктү сүзгөн. Ал оор абалда Бишкектеги Травматология жана ортопедия илим-изилдөө борборуна алып келинген. Карыпбековго эки сааттай операция жасалып, абалы оор деп бааланган.
Аталган борбордун жетекчиси Сабырбек Жумабеков бүгүн эртең менен Карыпбековдун ден соолугу жакшы боло баштаганын билдирди.
"Учурда абалы жакшы болуп, туугандары менен сүйлөшкөнгө жарап калды. Кошумча операция талап кылынбайт. Көзөмөлдөп жатабыз", — деди Жумабеков.
Белгилей кетсек, КТРК жетекчисине кан керек экени маалымдалган. Кан берүүнү каалагандар болсо 2-мартта эртең мененки саат 8.00дөн 15:00гө чейин кан борборуна келип тапшырса болот.
