БИШКЕК, 1-мар. — Sputnik. КТРКнын башкы директору Илим Карыпбеков жол кырсыгына түнкү саат 3.00дөр чамасында Токомбаев көчөсү менен чыгышты көздөй бара жатып кабылган. Бул тууралуу укук коргоо органдарындагы булак билдирди.
Учурда Карыпбековго Травматология жана ортопедия илим изилдөө борборунда операция жасалып жатат. Абалы оор экени айтылууда.
"Окуя Түштүк магистралынын боюнда жайгашкан "Сенатор" кафесинин тушунда, Токомбаев менен Байтик баатыр көчөлөрүнүн кесилишинде болгон. Жол тилкелерин бөлүп турган бордюрдан өтүп барып, Range Rover үлгүсүндөгү жолтандабас темир түркүктү сүзгөн", — деп айтылат билдирүүдө.
Саламаттык сактоо министрлигинин өкүлү Елена Баялинованын маалыматы боюнча Карыпбековду ооруканага алып келе жатканда жүрөгү токтоп, кайра калыбына келген.
