БИШКЕК, 2-мар. – Sputnik. Facebook социалдык тармагы өзүн-өзү өлтүрүүгө ыктаган колдонуучуларды жасалма интеллект менен аныктап, таап чыгат. Бул туурасында РИА Новости "Би-Би-Си" радиосуна таянып кабарлады.
Facebook кооптуулук жараткан чалууларды, алардын жазгандарын тааный турган алгоритмди иштеп чыккан. Жасалма интеллект анын жазган постторунан көңүлү чөккөн, жаны кейип турганы боюнча сөздөрдү издейт. Андан сырткары достору, тааныштары менен болгон жазышуулардындагы "Баары жакшыбы, эмне болуп жатасың?", "Сен үчүн кабатыр болуп жатам" деген сыяктуу сөздөрдү тапса, дароо өзүнө каттап алат.
Бул программа боюнча иштеген атайын топтун жетекчиси аталган чаралар "пайдалуу гана эмес, абдан зарыл болуп турганын" айтты. Бул долбоор азырынча АКШда гана ишке кирген.
Facebook психикалык саламаттык боюнча иштеген бир нече уюмдар менен кызматташып жаткандыгын кабарлады. Өзүнүн өмүрүнө кол салууга ыктаган адамдар атайын ылайыкташкан мессенжер аркылуу алар менен байланыша алат. Мындан сырткары, социалдык тармак онлайн-видео учурунда өмүрүн кыюуга жакын адамдарды таап чыга турган механизмди түзүү боюнча иштеп жатат.
