БИШКЕК, 1-мар. — Sputnik. Коомдук телерадиокорпорациясынын алдында Өмүрбек Текебаевдин тарапташтары митингге чыкканын каналдын жетекчисинин орун басары Калыбек Асылбашев билдирди.
Анын айтымында, митингге чыккандар Текебаевге карата козголгон кылмыш иши боюнча элге кайрылуу үчүн КТРК жетекчилигинен аларга эфир берүүнү сурашкан.
"Мен аларга чыгып жолугуп суроолоруна жооп берип уяткардым. КТРКда азыр абал оор экенин билдирип, башкы директор эртерээк сакайып кетишин айттым. Алардын дал ушул күнү келип жатканы акылга сыйбаган жорук экенин да айттым. Айрымдары "Кудай Илимди жазалады" деген сөздөрдү да кыйкырышты", — деди Асылбашев.
Эске салсак, 1-мартка караган түнү Карыпбеков Бишкектеги Аалы Токомбаев көчөсү аркылуу Range Rover машинасын айдап келе жатып, жол четинде турган түркүктү сүзгөн. Ал оор абалда Бишкектеги Травматология жана ортопедия илим-изилдөө борборуна алып келинген. Карыпбековго эки сааттай операция жасалып, учурда өзүнө келип сүйлөп калганын борбордун жетекчиси Сабырбек Жумабеков билдирди.
