БИШКЕК, 28-фев. — Sputnik. Кара-Балта шаардык кеңеши тарап кетиши ыктымал. Бул тууралуу Sputnik Кыргызстан агенттигине жергиликтүү шаардык кеңештин көпчүлүк коалициясынын башчысы Рустам Жолдошбаев билдирди.
Анын айтымында, жергиликтүү кеңештин депутаттары эки жолу шаар мэрин шайлай албай коюшкан. Эми мыйзамга ылайык шаардык кеңешти таратуу керек.
Бирок анын берген маалыматтарына караганда Борбордук шайлоо комиссиясы 27-февралда жергиликтүү башкаруу боюнча мыйзамга өзгөртүүлөрдү киргизүү тууралуу документти президентке кол коюуга жөнөткөн.
"Эгер өлкө башчысы бул өзгөртүүлөргө кол койсо, шаардык кеңешти таратаар алдында жергиликтүү кеңештерге үч жолу мэрди шайлоого мүмкүнчүлүк берилет. Азырынча биз жыйынтык күтүп жатабыз. Бирок кеңеш тарачудай болуп турат", — деди Жолдошбаев.
БШК азырынча бул тууралуу эч кандай түшүндүрмө бере элек.
