11-сентябрдагы терактыны уюштурган кишинин Обамага жазган каты жарыяланды

БИШКЕК, 9-фев. — Sputnik. АКШда 11-сентябрдагы трагедиялуу терактыны уюштурган деп түрмөдө отурган Халид Шейх Мохаммед жазган 18 барак каттын үзүндүлөрү жарыяланды. Кат экс-президент Барак Обамага жолдонгон. Бул туурасында РИА Новости Miami Herald басылмасына шилтеме кылып кабарлады. 

Катта Вашингтон 9/11 терактысына жүргүзгөн тышкы саясатынан улам өзү күнөөлүү деп айтылып, "дүйнө боюнча бейкүнөө адамдардын канын төккөн" деп белгиленген.

11-сентябрь туурасында айтып келип, ал күнү "силерге каршы согушту биз эмес, өзүңөр жана силердин өлкөдөгү диктаторлор жасады" деп жазган. Ал Обамага "кыйноолор менен тираниянын" президенти жана "жыландын башы" деп кайрылган.

Коомчулукка ачыкталган бул катта 2015-жылдын январь айы деген дата коюлган. Башында Гуантанамонун түрмөчүлөрү Мохамеддин катын жөнөткөндөн баш тарткан. Ал эми ушул эле жылдын сентябрь айында анын жактоочусу сотко бул ишке кийлигишүүсүн өтүнүп кайрылган. Анда камактагы киши президентке кайрылууга акысы бар экендигин айтылып, жыйынтыгында аскер соту макулдугун берген.

Каттын ээси өлүм жазасынан, өмүр бою абакка кесилүүдөн коркпой тургандыгын жана ырайым кылууну эч качан суранбай тургандыгын айткан.

Кувейтте туулган Мохаммед АКШны "Ирак менен Ирандан тарта Вьетнам жана Хиросимага" чейин кийлигишкен деп санап берген.

Жактоочунун айтымында, ал катты 2014-жылы, Израиль Газ секторуна карата аскердик операциясын өткөргөндө жазып баштаган. Ошентип "Газдагы зомбулук" анын Обамага кат жазуусуна негизги түрткү болгон. Каттын башында ал экс-президентке анын колдору бул аймакта "бир туугандарын, карындаштарын, балдарды өлтүргөнү үчүн колу али да канга малынып тургандыгын" жазган.